Pod sloganom „Baš je lijepo biti dijete”, juče su učenici OŠ „Savo Kažić” sadržajnim programom obilježili Dan škole i 98. školski rođendan. Stihovima „Mi smo mnogo vrijedni bili, program smo vam pripremili. Nek se s pjesmom odmah krene, nek vam lica porumene. Zapjevajte i vi sa nama, oprobajte glas, bodrite nas aplauzom, budite uz nas, jer ko priredbu našu prati taj se neće pokajati...” obratila se domaćinima i gostima Darka Đukanović, direktor.
- Ove godine nastavu u školi pohađa 41 učenik, što je za osam đaka više nego prošle godine a već smo upisali i pet prvaka za narednu školsku godinu što nas posebno raduje. To povjerenje koje nam roditelji ukazuju govori da naša ustanova vrijedi. Zato se sve radi na njenoj što boljoj promociji i na što kvalitetnijem obrazovanju. Ova naša vaspitno obrazovna ljepotica puni 98 godina, a i dalje živi u punom sjaju, zahvaljujući ljudima koji su u nju ulagali i ulažu i ja sam sigurna da će tu tradiciju nastaviti kako sadašnje tako i buduće generacije - kazala je Đukanović.
Među publikom su se osim roditelja juče mogli sresti i bivši đaci te ustanove, danas proslavljeni sportisti među kojima i profesionalna rukometašica Olivera Vukčević, koju samo najljepše uspomene vežu za osnovnu školu. Kako je kazala, kad god je pogleda ne može a da ne pomisli kako su iz tako male ustanove izašli tako veliki ljudi.
- Dostina učitelja i nastavnika koji su meni predavali danas više ne rade tu ali sam prilaz školi i žagor djece koja sa nestrpljenjem ulaze u nju u meni je danas probudio neki poseban osjećaj. Gotovo da ne postoji riječ kojim bih to mogla opisati. Kad sam ja učila bilo nas je osmoro i sa svima se sretnem i danas i svaki put imam osjećaj kao da sam srela nekog brata ili sestru. To je draž koja se ne može osjetiti i doživjeti u velikim, gradskim školama. Sviđa mi se i što ulažu u školu i obrazovanje, to me posebno raduje- kazala je Vukčević.
Sa njom je saglasan i Luka Pejović, bivši reprezentativac koji već neko vrijeme nosi dres „Iskre”. Kako ističe, posebno ga je obradovalo što je na rođendanskoj proslavi sreo profesora fizičkog vaspitanja Svetozara Raičevića.
-Kad sam ja učio ovdje, do četvrtog razreda nas je bilo četvoro, a kasnije jedanaestoro, a danas ih ima i preko četrdesetoro. To me raduje jer je to znak da moja škola i dalje živi jer je jedno vrijeme vladalo neko zatišje, a sad Barutana ponovo dobija sjaj koji je minulih godina bila izgubila. Inače, Barutana je centar Lješanke nahije i OŠ „Savo Kažić” je za sve ove godine iznjedrila mnogo dobrih i kvalitetnih ljudi tako da mogu biti samo ponosan što sam bio tu osam godina i što dolaze nove generacije koje čeka isti osjećaj- naveo je Pejović.
Učenici su sa direktoricom juče tradicionalno položili cvijeće na bistu Sava Kažića u dvorištu škole.
S.R.
Komentari
Komentari se objavljuju sa zadrškom.
Zabranjen je govor mržnje, psovanje, vrijedjanje i klevetanje. Nedozvoljen sadržaj neće biti objavljen.
Prijavite neprikladan komentar našem
MODERATORU.
Ukoliko smatrate da se u ovom članku krši Kodeks novinara, prijavite našem
Ombudsmanu.