Izložba fotografija jednog od najistaknutijih protagonista riječke fotografske scene Ervina Debeuca koju je priredio Narodni muzej Crne Gore u saradnji sa Muzejom grada Rijeke, otvorena je u galeriji „Atelje Dado” na Cetinju.
Dobrodošlicu publici poželjela je rukovodilac Umjetničkog muzeja, istoričarka umjetnosti Mirjana Dabović Pejović koja je istakla da ova izložba koja nosi naziv „Kompozicija fotoslike” predstavlja pravo osvježenje i da je lijepo u ovom, kako je rekla, savremenom digitalnom svijetu, ponovo se vratiti klasičnoj fotografiji i to originalima iz fonda Muzeja grada Rijeke.
– Ovoga puta imamo čast i zadovoljstvo da vidimo dio zbirke od oko 70 fotografija koje je Ervin Debeuc još za života poklonio Muzeju grada Rijeke – kazala je Dabović Pejović.
Kustoskinja Muzeja grada Rijeke Sabrina Žigo podsjetila je da je Ervin Debeuc rođen 1930. godine, a umro 2016. te da je već u mladosti od svoje dvadesete godine snimao fotografije pune medijske dorečenosti.
– One ne samo da su tehnički dorečene, one su i kreativno, umjetnički i poetski dorečene i to su mirni motivi. Moramo biti svjesni da je to vrijeme poslijeratne Rijeke koja je teško stradala u Drugom svjetskom ratu i još nije bila niti politički afirmisana niti priznata kao politički entitet, tako da je to rano razdoblje 1950. godina bilo zaista siromašno, ali se u sklopu foto-amaterskog pokreta u Rijeci odvijao fotografski život i ona je bila značajno fotografsko središte nekadašnje Jugoslavije – kazala je Žigo.
Ona je istakla da je Debeuc cijeli proces realizacije crno-bijele fotografije izvodio sam, od snimanja do razvijanja hemijskim analognim putem u foto-laboratoriji pa do izrezivanja ili izbora kadra koji je snimio. Izložba „Kompozicija fotoslike” Ervina Debeuca biće otvorena u „Ateljeu Dado” do 20. oktobra.Z.P.
Komentari
Komentari se objavljuju sa zadrškom.
Zabranjen je govor mržnje, psovanje, vrijedjanje i klevetanje. Nedozvoljen sadržaj neće biti objavljen.
Prijavite neprikladan komentar našem
MODERATORU.
Ukoliko smatrate da se u ovom članku krši Kodeks novinara, prijavite našem
Ombudsmanu.
)){kind=small}
