Blagdan Uznesenja blažene Djevice Marije, u narodu poznat kao Velika Gospa, i ove je godine proslavljen u marijanskom svetilištu Ratac. Na svečanom misnom slavlju, koje je predslavio upravitelj svetilišta don Dejan Turza, a propovijedao don Pero Burečić, okupilo se oko 150 vjernika. Pjevale su Milosrdne sestre Svetoga Križa iz Bara.
Don Dejan Turza je istakao da, iako je na ovom mjestu postojala starija monaška zajednica, o čemu svjedoče kasnoantički arhitektonski ostaci iz V i VI vijeka, Benediktinci na Ratcu osnivaju svoju opatiju, koja se u povijesnim dokumentima spominje 1247. godine. Do tada, to je sve bila Opatija sv. Mihaela arkanđela, kao i Benediktinske opatije u Stonu i na Prevlaci u Tivatskom zaljevu. Titul Opatije se mijenja u XIII stoljeću, dolaskom ikone sv. Marije u Ratac, koja je vrlo skoro bila široko poznata. Prema njegovim riječima, značaj Benediktinske opatije Svete Marije Ratačke raste i najviši stadij dostiže u XV vijeku.
- Ratačka opatija je važno hodočasničko središte na ovoj strani Jadrana, a tome je doprinijela ikona sv. Marije. Ikona je čuvana u Opatiji sve do 1443. godine, do ozbiljnih prijetnji od turskih provala. Od tada prelazi u katedralu sv. Juraja u Starom Baru, a zatim joj se gubi svaki trag 1571. godine nakon pada Bara - kazao je don Dejan, dodajući da nije tačno utvrđeno kada su monasi napustili Ratac, te da se u knjizi Ivana Jovovića ,,Iz prošlosti Dukljansko-barske nadbiskupije” 1532. spominje kao godina od koje monasi više ne žive aktivno u Opatiji.
- Ipak, u Venecijanskom arhivu postoji dokument iz 1574. godine koji svjedoči da Benediktinci i dalje žive monaškim životom u svojoj Ratačkoj opatiji - kazao je on.
U svojoj propovijedi Don Pero je, stičući prvenstveno važnost hodočašća za vjernički život, govorio o tome što ova svetkovina kaže o Mariji, njenoj veličini, slavi i moći njenog posredovanja, kao i o tome što ova svetkovina znači za vjernike. Prema njegovim riječima, sama potreba za putovanjem, odlaskom na sveta mjesta, često i nesvjesno potvrđuje veliku istinu da je čovjek beskućnik koji stalno pita i traži, koji ne nalazi smiraj u zahtjevima i mogućnostima svakodnevice, pa teži za boljim, ljepšim, vječnim.
- Svetkovina Marijina uznesenja u nebo upravo nam to želi poručiti, istinu da čovjek neće pronaći mir dok se ne smiri u Bogu. Marija nam u današnjoj svetkovini pokazuje put, svojim primjerom i svojom vjerom koja ju je pratila cijelog života - istakao je don Pero.
Don Dejan je na kraju svete mise obavijestio vjernike da će od jeseni započeti parcijalna obnova ovog sakralnog kompleksa, kao i da se računa na pomoć vjernika i Ordinarijata Kotorske biskupije, te da je preko Ministarstva za ljudska prava osiguran dio materijalnih sredstava.
D.S.
Komentari
Komentari se objavljuju sa zadrškom.
Zabranjen je govor mržnje, psovanje, vrijedjanje i klevetanje. Nedozvoljen sadržaj neće biti objavljen.
Prijavite neprikladan komentar našem
MODERATORU.
Ukoliko smatrate da se u ovom članku krši Kodeks novinara, prijavite našem
Ombudsmanu.